Рождество Богородицы. Роспись Покровского храма

Величаем Тя, Пресвятая Дево, и чтим святых Твоих родителей, и всеславное славим рождество Твое.

Показуя Тя вышитую всея твари, Богородице Чистая, Сын Твой величит Твое рождество, еже от Анны, и всех веселит днесь.

Тя, Богоневесто, Христос яви похвалу и державу всем поющим верно Твое таинство. Почитают рождество Твое бесплотных чини: радости бо земная (селения) Ты наполнила еси едина; тем Тя Всенепорочную вернии славим, в пениих славословяще: свет бо сущим во тьме возсияла еси, яко утренний возсиявший день.

Купина в горе огнеопальная и росоносная пещь халдейская яве предписа (предъизобразила) Тя, Богоневесто: Божественный бо невещественный Огнь в вещественнем чреве неопально прияла еси. Иже непокоривым людем из камене источив воду, благопокоривым языком (народам) дарует от чресл неплодных плод на веселие нам — Тя, Богомати пречистая, Юже достойно величаем.

Слышу Давида поюща Тебе: приведутся девы во след Тебе, введутся в храм Царев, — и с ним Тя и аз Дщерь Цареву воспеваю. Божественный пророк (Исаия) прописа проявленнейше свиток Тя нов, в немже перстом Отчим Слово напишется Дево, написуя в книзе жизни благостию вся, Того начальству повинующияся.

Ныне да веселится небо, да радуется же земля и да ликуют Иоаким и Давид, ов убо яко родитель Твой, истинно Рождшая Бога, ов же, яко праотец Твой, проповедая Твоя величествия, Чистая.

Радуйся, Чистая, Мати и Рабо Христа Бога, яже Ходатаица первому (райскому) блаженству: человеческий род Тя, вси достойно песньми славим.

Святую-святых сущу целомудреннии родители Твои, Чистая, возложиша Тя в храме Господни, воспитатися честно и уготоватися в Матерь Ему.

Воспитавшися во Святая-святых, Дево Пречистая Богородице, вышши твари явилася еси, Зиждителя плотию порождши.

В Тебе Троическое таинство поется и славится, Чистая: Отец бо благоволи, и Слово вселися в Тя, и Божественный Дух Тебе осени.

Всемирныя радости возсияша миру мысленныя лучи, предвозвещающия всем Солнце Славы Христа Бога — в рождестве Твоем, Пречистая: Ты бо Ходатаица явилася еси истиннаго веселия же и благодати.

Тя от Анны рожденную, незлобивую Агницу, Агнца Христа младенца от чрева Твоего приведшую в наше существо, вси песньми Тя почитаем.

Ты едина земных показалася еси спасение, яко рождши Слово паче слова и естества: тем Тя ублажаем.

Светодавца и Начальника жизни человеческия рождшая Чистая Богородице, явилася еси сокровище жизни нашея и дверь неприступнаго Света.

Рождество Твое, Богородице Дево, радость возвести всей вселенней: из Тебе бо возсия Солнце правды, Христос Бог наш, и разрушив клятву, даде благословение, и упразднив смерть, дарова нам живот вечный.

Рождшися преславно от неплодных ложесн, от девственных чресл родила еси паче естества; красен бо явлыпися стебль, израстила еси миру Жизнь: сего ради Силы Небесныя вопиют Тебе, Богородице: слава пришествию Твоему, Чистая; слава рождеству Твоему; слава девству Твоему, Мати Безневестная!

Ты Бога едина родила еси, Дево, преславно; Ты естество обновила еси рождеством Твоим, Марие; Ты Еву разрешила еси первородныя клятвы, Богородительнице Чистая.

Адам свободися и Ева ликует, и вопиют духом к Тебе, Богородице: Тобою избавихомся первородныя клятвы, явльшуся Христу.

Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем; то празднуют и людие Твои, вины прегрешений избавльшеся, внегда звати Ти: неплоды раждает Богородицу и питательницу жизни нашея.

Поем святое Твое рождество, чтим и непорочное зачатие Твое, Невесто Богозванная и Дево; славят же с нами Ангелов чини и святых души.

Празднуем, Чистая, и верно покланяемся святому Твоему рождеству, поюще Сына Твоего, Имже ныне избавихомся древняго Адамова осуждения.

Пеленам покланяемся Твоим, Богородице, славим Давшаго плод прежде неплодней (матери Твоей) и преславно Отверзшаго ложесна нераждающей: творит бо вся елика хощет, Бог сый самовластен.

Пречистое Твое рождество, Дево непорочная, несказанное и зачатие, неизглаголанно и рождение Твое, Невесто неневестная: Бог бо бе весь (в Тебе), в мя облекийся.

Чужде матерем девство и странно девам деторождение; на Тебе, Богородице, обоя устроишася: тем Тя вся племена земная непрестанно величаем.

О новейшаго слышания: Бог — Сын Жены! О безсеменнаго рождества: безмужная — Мати и рожденное — Бог! О ужаснаго видения! О зачатия страннаго Девы! О несказаннаго рождества! Истинно, вся паче ума и видения!

Кто виде Отроча, Егоже не всея отец, млеком питаемое? или где видена бысть Дева — Мати? Истинно, паче ума обоя, Богородительнице Чистая!

Крепость верным и стена, и князем держава Ты еси, Пречистая, и по Гавриилову благовещению Бог родися из Тебе. Тобою, Пречистая, всем истекают лучшая, и на земли живущии к небеси восходят.

Ангеловым проречением плод пречист от праведников Иоакима и Анны днесь произыде — Дева, Небо и Престол Божий, и приятелище чистоты, радость провозвещающи всему миру, жизни нашея Ходатаица, клятвы отъятие, благословения подание: тем в рождестве Твоем, Дево Богозванная, миру мир испроси и душам нашим велию милость.

Всечестное Твое рождество светло торжествуем со Ангелы, Мати Дево Чистая; но о Богородительнице, не престай защищати христиан, воспевающих Тя!

Лучи просияша всемирныя радости — рождества Твоего, Дево Мати Марие, на земли, и озариша мысли любовию поющих Тя.

Яко дар Тебе, от Анны рождшейся, песнопение верно дароносим, Богородице, славословяще матери —Матерь, девы же —Деву едину, покланяемся Тебе, поем и славим.

Ум человеческий по достоянию пета Тя, Владычице Пречистая, Богородице, недоумеет; но мы зовем Ти, яже Архангел Гавриил провеща: радуйся, Адамово свобождение, радуйся, праматере Евы оправдание; радуйся, мира спасение; радуйся, Мати Христа Бога!

Рождшая Свет, просвети ны, торжествующия духом светоносное Твое рождество, Богородительнице, и света будущаго причастники покажи, Пречистая, и мир подаждь и избавление, лютых Матерними Твоими молитвами.

Пречистыя руки Твоя, Дево Мати, простерши, покрый уповающия на Тя и Сыну Твоему зовущия: всем подаждь, Христе, милости Твоя!

Святая, блаженная Мати Божия, поющия Тя любовию спаси, разоряющи молву искушений, милостивно, яко Бога рождши: вся елика хощеши, творити можеши, Дево: темже Тя величаем.

Со апостолы моли, Богородице, Твоего Сына и Господа, помиловатися всем поющим Тя, и славящим, и во иконах Тя чествующим, и покланяющимся достойно, и любовию облобызающим.

Дивятся, Мати Божия, небеснии чини красоте души Твоея и чистоте девства Твоего; мы же, земнии, недоумеем глаголати несказаннаго рождества Твоего: емуже тайно научающеся, познахом Тя рождшую Христа Бога нашего, Егоже милостива нам сотвори в день судный страшнаго пришествия Его.

Направи мое, Богородице, житие, наставляющи повелении Божественными Слова, воплощшагося из Тебе, и к свету настави, Дево—Мати, Марие Богоневесто!

Из Троицких листков архиепископа Никона (Рождественского)